خه‌می دووری

بۆ نه‌ناڵێم

له‌کاتێکا خه‌می دوریت

بۆته‌ قوڵپێک له‌ گریان و

تادێ قوڵتر ئه‌متاسێنێ ،،

بۆچی به‌سه‌ر خۆما نه‌ده‌م

بای بێواده‌ی وه‌رزی کۆچت

وا خه‌ریکه‌

گووڵی هیوام ئه‌وه‌رێنێ ،،

من ئێستاکه‌ له‌ بێتۆی

هه‌وارێکی بێده‌نگم و

له‌ناو بیل بیله‌ی چاوه‌کانتا

قه‌تیس ماوم ،،

ڕێبوارێکی عه‌وداڵم و

بۆ دوری تۆ

ده‌ست به‌سراوو

کۆت کراوم ،،

ئه‌م ئێستاکه‌

خه‌می دوریت

بۆته‌ باڵنده‌یه‌کی کۆچڕه‌وو

وا خه‌ریکه‌

هێلانه‌ی تۆ له‌ هه‌ناوما چۆڵ ئه‌کا ،،

کانی چاوم بۆ بێده‌نگیت

وا تۆفانێک

له‌ پایزی ئه‌م ته‌مه‌نه‌مدا ساز ئه‌کا ،،

بۆ هه‌میشه‌ تارمای تۆ

له‌ شه‌وانی ده‌یجوریدا

ئاڵاوه‌ به‌ گه‌ردنماو

یاده‌کانتم له‌مساته‌دا نیشان ئه‌دا ،،

نامه‌کانت جارێکی تر

دێنه‌وه‌ ناو ئه‌م شه‌وگاره‌و

له‌گه‌ڵ شێوه‌ت

له‌به‌ر چاوما سه‌ما ئه‌کا ،،

بڕوا ناکه‌م

کۆچی دوریت له‌ ناخما

بۆ هه‌تایا

جوانیه‌کانت بشواته‌وه‌ ،،

گه‌رچی دڵم بۆ ئه‌م دوریه‌ت

له‌ناو کونجی غوربه‌تایه‌و

به‌ڵام هه‌رگیز

 گوڵی شێوه‌ت

گه‌رچی به‌ جه‌سته‌ لێم دوربێ

به‌ڵام ڕۆحت

 تێکه‌ڵ بهخوێن و‌ ئه‌وینمه‌و

بڕوا ناکه‌م

بۆ چرکه‌یه‌ک جیا بێته‌وه‌ ،،

من هه‌میشه‌ خۆشمئه‌وێیت

له‌ هه‌رکوێبی                   

چاوم هه‌وری ئاسمانێکه‌و

هێدی هێدی

نمه‌ی باران به‌سه‌ر کێڵگه‌ی

ڕۆحی تۆدا ئه‌بارێنێ ،،

له‌ هه‌رکوێبی

دڵم تیشکی هه‌تاوێکه‌و

ڕۆژی سه‌د جار

خۆی له‌ده‌وری گۆناکانت

ده‌ئاڵێنی ،،

دڵنیابه‌ خۆشم ئه‌وێیت .

لێت نابورم

لێت نابورم

چونکه‌ من بوم

بۆ هه‌میشه‌ له‌گه‌ڵ تۆدا

هه‌وار نه‌ما نه‌یگرمه‌ به‌ر

جێیه‌ک نه‌ما ،

پێیه‌کانم به‌دوای تۆدا

هه‌نگاو هه‌نگاو نه‌یبڕیبێ ..

بن دار نه‌ما و شه‌قام نه‌ما

چاوه‌کانم و لێوه‌کانم

ئاوێزانی تۆ نه‌بوبێت

له‌ ناخمه‌وه‌ خۆشم ئه‌ویستی

ئه‌و کاتانه‌ی که‌ بۆ

 ساتێک دور ئه‌بوی لێم

له‌ سۆنگه‌ی چاوه‌کانته‌وه‌

ڕێگه‌م به‌ په‌پوله‌کان ئه‌گرت و

هه‌واڵی تۆم لێ ئه‌پرسین ..

ده‌ستم له‌ ملی وێنه‌که‌ت ده‌ ئاڵاندو

 له‌گه‌ڵ گوڵه‌کانی عه‌‌شقدا

به‌ یه‌خه‌مدا هه‌ڵمه‌واسین ..

به‌ڵام ئاخخخخخخخخ ..

من نه‌مزانی تۆ ئه‌و ده‌مه‌

چاوت کردبوه‌‌ ڕوبارێکی پڕ له‌ سیحرو

دڵت ته‌خته‌ی شانۆیه‌کی بێویژدانی

ئه‌وه‌ی کردت سیناریۆ بو

گریانه‌کانت بێهوده‌و

وته‌کانت فریوێک بون

نه‌مئه‌زانی..

له‌و ساته‌شدا ،، بۆ عه‌شقی تۆ

من مه‌رد بوم و

تۆش په‌‌یکه‌رێک له‌ شێوه‌ی به‌رد ..

به‌بێ هوده‌ ئه‌مپه‌رستی و

به‌ کاڵ فامی

کڕنوشم بۆ درۆت ئه‌برد ..

بۆیه‌ هه‌رگیز لێت نابورم

دڵنیابه‌ ،، گه‌ر فرمێسکی په‌شیمانیت

دڵۆپ ،، دڵۆپ

ببنه‌ ده‌ریای چاوه‌کانت

من ئه‌و کاته‌

چاوه‌کانی خۆم ده‌ردێنم ..

دڵنیابه‌

گه‌ر بته‌وێت هه‌تاوی رووت

جارێکی تر

به‌ په‌نجه‌ره‌ی ژوری دڵما گوزه‌ر بکات

ئه‌وسا منیش

ده‌رگای دلم داده‌خه‌م و

واز له‌ تیشکی خۆریش دێنم

دڵنیابه‌ لێت نابورم ..

چونکه‌ بێهۆ

هه‌وری ڕه‌شت کرد به‌ گژی

ئاسمانی دڵی مناو

ئه‌ستێره‌ی به‌ختت  شاردمه‌وه‌ ‌..

له‌خۆڕا بوو

له‌وه‌رزی به‌هاری دڵما

ڕه‌شه‌بای ڕقت هه‌ڵکردو

گوڵه‌کانمت لێکردمه‌وه‌ ..

لێتنابورم

چونکه‌ شێوه‌ت

ده‌مامکی خیانه‌تی له‌ سه‌ردابوو ..

گورگ بویت و له‌ پێستی

مه‌ڕدا خۆت نوان

تۆ دڕکێکی بێزراو بویت و

خۆت کرده‌ گووڵ

په‌پوله‌کانی عه‌شقمت

بۆهه‌تایه‌ هه‌تایه‌ تۆراند ..

بۆیه‌ منیش

 لێت نابورم ،، لێت نابورم

 ڕێبه‌ند هه‌ڵه‌بجه‌یی
 

Reband-halabjay@hotmail.com